Mark 5

Jesura Ema 'Avena Sisei Rosavi'ina Siomahajina

(Matiu 8:28-34; Ruku 8:26-39)

1'Ejume pu soha sue ropuna'i kwaa iha Kerasinisi usevara. 2Hu sisima vaji ariha ro'eme ea ka'ene 'avena sisei ajivi'inijaho euchi hinuna'omo roe piunamana. 3Ea kajaho euchi hinuna'omo ea hu niho'o senia areri pakamovura. 4Na'ia mapoka'e ea kajaho anikuroa 'ee senia kamovujaho hu turama useuna'omo ei pini hua 'ajoahuna areri pana. 5Hu na'ia veiri'a euchia 'ee huri'a vaji emaavaji'i muna 'eke huni haha puavi'i hinuna. 6'Ejume hu kahakaro namiji'i Jesu kamarena ninuma roe Huni una'i nitupari samana. 7Hu ira ajira emaavaji'i ijá 'wama Jesu Godi niho'o Natohwi jihuni Hariha A iraka na veti'ena? Na jarirama 'waravukúne A na pasise'i 'ahi'amana 'wamana. 8'Avena siseijara 'warama jihuni maijaho Jesura 'avena siseakera eakaho rana'i kaivo 'e'una 'wamajihuna'e 'waramana. 9'Ejume Hu ijá 'wama Oni iha irane? 'wamana. Hu eha vena ijá 'wama Nuni iha Rijani. Ijihuni maijaho nú 'avena mapoka 'wamana. 10Hu hina mi'imi'ivi'i Hu kwaa pina pairechamúe va'a 'wamana. 11Maha mapoka kahe 'iruma iji'i huri'a hari hiju. 12'Ejume pu mi'imi'ivi'i Hu ijá 'wava A irechamúe nú va'e maha kahehi puni vaji va'a 'wavara. 13'Ejume Jesu pu irechamiume 'avena sisesa kajija ariha va'e maha ajimaume maha mapoka mapoka (2,000) ni'aha kwinu 'urina ninukujaha va'e rarahi arihe soha vaji niname imwasamiume kwamasahara. 14Emaa ka'ene maha 'ajohi'inijija kimareja juhaha ninuma va'e ari ora'e 'waramapenojume ea mapoka raka ka'ene renaji ki'i 'ahiume roara. 15Pu Jesuni roi kavume ea ka'ene 'avena sisei ajivi'inijaho ateha iruhe húmata mara'eme masuani hijuma pu kamareja niho'o tea junamana. 16Ea ka'ene kavajipo 'avena sisei ajivi'ini jihuni vu'a 'ee maha puni vu'a ni'aha kwino ari ora 'waravara. 17'Ejume ari ora kajipo aneja vene 'ejahae ijá 'wava A núni kwaa are'i kaivo va'a 'wavara. 18'Ejume Hu 'urina sisima ajima va'iro vejumakavi'i ea ka'ene 'avena sisei ajivi'ina kajara Hu hu'úmo va'irono 'waramana. 19Hu tanurahe pava'amarono 'waramana. 'Enakaivo Hu ijá 'wama Ehuapuni va'e raka ka'ene Godira vetae ni'ajahajaho ijá ehuana 'wara'amana 'wamana. 20'Ejume hu 'urina va'e Tikaparasi Jesura raka ka'ene hua'e vetiajaho ijá najahume pu ea maho'o hena oja niho'o hwa'usahara.

Jairasi Oni 'Apaja 'Ee Napari Jesuni Ateha 'Unamajina

(Matiu 9:18-26; Ruku 8:40-56)

21Sisima 'aha kajino Jesu kú'o sue toa ropuna'i va'eme ea mapoka toa rora kajino nianaa roara. 22Jairasi Sinakoku kaukara 'ajohi'ina pina'omo roe Jesu kame nitupari satiana. 23'Ene niho'o 'ejahae ijá 'wama Nuni 'apaja niho'o kwa'iro venu. A huni roe ija 'unave maraje hinama 'wamana. 24'Ejume Jesu hu hu'úmo va'eme ea mapoka roajime 'unama tanu'urahara. 25Napara pina juara iropu ropu no'o 'ai vuaravu'e hinuna. 26'Ejukamare'e hu juketapo na'ia mapoka amairiahura kaivo hu pamaranuna. Hu monia mapoka 'úsia 'imenuna kaivo venahujaho pamarane 'ee niho'o siserana paranuna. 27Ijá ve'eme napara kajaho hiji'i hejume ea 'ahopo Jesura raka ka'ene venuji 'wavuma henarena 'urina ea vaja kajino 'uraha ruva'uvaume Jesuni túna'i namiji'i Huni ateha 'unamana. 28Hu ijá rona Na Huni atehake 'una'ujaho sonahi'ena ronana. 29'E'ikaivo hu ateha Huna kajaho uri 'unama kajino ni'aha kwino 'aa huna kajaho pa'arenana. 'Ejume napara kajaho henajaho huni haha vaja sonanana. 30Ijá ve'eme Jesuni harura ma'uako pa'arejuma henarena Jesu ta'arohe nia niriapenoji'i aporama ijá 'iama Irara Nuni ateha 'unamane? 'iamana. 31'Ejume tisaiporu epo ijá 'wava Ea mapoka ani reja kajihipuni vaji A naminana'omo pura 'unaravara. 'Enakaivo A raka vena Irara 'unirimana 'úmo? 'wavara. 32Jesu kú'o nirie napara ka'ene ateha 'unamajaho samapenonana. 33Ijá ve'eme ijí napara kajaho henajaho huni haha nisonavuma henarena juma simavi'i ni'aha kwino Jesuni una'i oji'i nahama Jesu 'waramana. 34Hu napara kajaho ijá 'wama Naparakera a iraka ka'ene nimaa rona ijarahara vejume a maranaana. A sonahaanakúna teamana'eje va'a 'wamana. 35Hu hina vu'a 'wara'eme ea 'aho'a Sinakoku natohwijihuni sei rena roe ijá 'wava 'Apajuna nikwamana kaivo rakijihuna'e Najahi'ina 'waravi'i hino? 'wavara. 36'Enakaivo ea kajipuhipo vu'aka 'waravajaho Jesu henarena Hu Sinakoku natohwa ijá 'wama A patea junamana kaivo nimaa ro'amana 'wamana. 37'Ejume Jesu ea mapoka ruravume hijumakivi'i Pita ho Jemisi ho 'ee 'u'ua huna Jonina'omo ijihi pu'úmo va'ara. 38'Ejume pu va'e Sinakoku natohwi jihuni sei usevi'i hejume pu niramaruma piraname niho'o natohwa temukavara. 39'Ejume Hu ijí sei vaji ajima va'arena ijá 'iama Ja raka venare'e niramaruvo? Napaiseakaho pakwamana kaivo hu nenu 'iamana. 40'Ejume pu ijahume Hu pu ma'ahi irechamiuma va'ara. 'Ejume Jesu Huni tisaiporu no'opisune oaha omaha aherame napaisea kajara namajino va'ara. 41Jesu napaisea ija 'unavi'i Arameka opuni iri ijá 'wama Tarita Kumi 'wamana. Tarita Kumi ijihuni maijaho napaiseakera 'urina! 42'Ejume ni'aha kwinu napaisea kajaho 'urina 'urahonana. Napaisea kajaho juara iropu ropu no'o pa'arenana. Ijá vejuma kamarena ea ka'ene ijí hijajaho niho'o natohwa oja hwa'usahara. 43Jesu pu ajira ijá 'iama Ja ike Nara vejukaho ea 'aho'a pa'wara'avara kaivo napaiseakaho 'iruma i'imaha 'iamana.